ಇತ್ತೀಚಿಗೆ ಗೆಳೆಯರೊಬ್ಬರು ಹೋಂಡಾ ಕಂಪನಿಯ ದ್ವಿಚಕ್ರ ವಾಹನದ ವಿವರ ಪುಸ್ತಿಕೆ ಅಂದ್ರೆ Manual ಕನ್ನಡದಲ್ಲಿ ಕೇಳಿ ಹೋಂಡಾ ಸಂಸ್ಥೆಗೆ ಮಿನ್ಚಾಯಿಸಿದ್ದರು.ಅದಕ್ಕೆ ಹೋಂಡಾ ಕಂಪನಿ ನೀಡಿದ್ದ ಪ್ರತಿಕ್ರಿಯೆ ಅಚ್ಚರಿ ಹುಟ್ಟಿಸುವಂಥದ್ದು.ನಮ್ಮ ದೇಶದಲ್ಲಿ ವಿವಿಧ 25 ಭಾಷೆಗಳಿದ್ದು ಅವುಗಳಲ್ಲಿ ಮಾಹಿತಿ ನೀಡಲು ಅಸಾಧ್ಯವಂತೆ. ಕನ್ನಡದಲ್ಲಿ ನೀಡಲು ಆಗದು, ಹೆಚ್ಚಿನ ವಿವರಗಳಿಗೆ ಇಂಗ್ಲಿಷ್ ಮಾಹಿತಿಯನ್ನೇ ಅವಲಂಬಿಸಿ ಎಂದು ನಿಷ್ಟುರವಾಗಿ ಉತ್ತರಿಸಿದೆ ಹೋಂಡಾ ಎಂಬ ಜಗತ್ತಿನ ಅತಿ ದೊಡ್ಡ ಆಟೋಮೊಬೈಲ್ ಸಂಸ್ಥೆ.
ದೊಡ್ಡ ಆಟೋಮೊಬೈಲ್ ಕಂಪನಿಯ ಈ ನಡೆ ವಿಚಿತ್ರವಾಗಿದ್ದು, ಒಂದು ಕುತುಹೂಲ ಕೂಡ ಮೂಡಿಸಿತು.ಇದರ ಪರಿಣಾಮವಾಗಿ ಒಂದು ಚಿಕ್ಕ ಸಂಶೋಧನೆ ಕೈಗೊಂಡಾಗ ಈ ಕೆಳಗಿನ ಚಿತ್ರಣ ಕಂಡುಬಂತು.
ಹೊಂಡಾ ನಮ್ಮ ಕರ್ನಾಟಕ ರಾಜ್ಯದಲ್ಲಿ ಎಷ್ಟು ವ್ಯವಹಾರ ನಡೆಸುತ್ತಿದೆ ಎನ್ನುವತ್ತ ಒಂದು ಕಿರುನೋಟ ಬೀರಿದಾಗ ಕಂಡು ಬಂದ ಕೆಲವು ಅಂಕಿ-ಸಂಖ್ಯೆ ಹೀಗಿದೆ ನೋಡಿ!
ರಾಜ್ಯದಲ್ಲಿ ಹೋಂಡಾ ಒಟ್ಟು 55 ಶೋರೂಂಗಳನ್ನು ಹೊಂದಿದೆ. ಅವುಗಳ ಮೂಲಕ ತಮ್ಮ 11 ವಿವಿದ ಮಾಡೆಲ್ಗಳನ್ನ ರಾಜ್ಯದಲ್ಲಿ ಮಾರಾಟ ಮಾಡುತ್ತಿದೆ.ಇವುಗಳಲ್ಲಿ ಕಡಿಮೆ ಬೆಲೆಯ ಡಿಯೋ ದಿಂದ ಹಿಡಿದು 2ಲಕ್ಷಕ್ಕೂ ಮೇಲ್ಪಟ್ಟ ಬೆಲೆಯ ಸಿಬಿಆರ್ -250 ಮಾಡೆಲ್ಗಳು ಸೇರಿವೆ.
ನೇರ ಮಾರಾಟ,ಬಿಡಿ ಬಾಗಗಳ ಮಾರಾಟ ಮತ್ತು ವಾಹನಗಳ ಸರ್ವಿಸ್ ಮೂಲಕ ಒಟ್ಟು ವ್ಯವಹಾರ ಸುಮಾರು :1109,04,00,000 ರೂಪಾಯಿಗಳು.
(ಮಾಹಿತಿ :www.honda2wheelers.com)
ಇನ್ನು ವಿವಿಧ ವಿಮೆ ಕಂಪನಿಗಳೊಂದಿಗೆ ಕೋಟ್ಯಾಂತರ ರೂಪಾಯಿಗಳ ಒಪ್ಪಂದ ಮಾಡಿಕೊಂಡಿರುವ ಹೋಂಡಾ ಕಂಪನಿಯವರು ಅದರಲ್ಲಿ ಎಷ್ಟು ಪಾಲು ಆದಾಯ ಪಡೆಯುವರು ಎನ್ನುವ ವಿವರಗಳನ್ನ ಇಲ್ಲಿ ಗಣನೆಗೆ ತೆಗೆದುಕೊಂಡಿಲ್ಲ ಅನ್ನುವುದು ಅರಿವಿರಲಿ.ಒಟ್ಟಿನಲ್ಲಿ ಹೇಳುವುದಾದರೆ ಸರಿಸುಮಾರು 1100 ಕೋಟಿಗೂ ಮಿಕ್ಕಿದ ದುಡ್ಡು ಹೋಂಡಾ ಕಂಪನಿಗೆ ಕರ್ನಾಟಕದಿಂದ ಬರುತ್ತಿದೆ. ಇಷ್ಟೊಂದು ಆದಾಯ ನೀಡುವ ನಾಡಿನ ಗ್ರಾಹಕರಿಗೆ ಈ ಸಂಸ್ಥೆ ಇಲ್ಲಿನ ಭಾಷೆಯಾದ ಕನ್ನಡದಲ್ಲಿ ವಿವರ ಕೈಪಿಡಿ ನೀಡಲು ಹಿಂದೇಟು ಹಾಕಿದ್ದು ನಿಜಕ್ಕೂ ಆಶ್ಚರ್ಯದ ಸಂಗತಿ.
ಹೋಂಡಾ Manual ಗಳಲ್ಲಿ ಹಿಂದಿಯಲ್ಲಿ ಸುರಕ್ಷತೆಯ ಕೆಲವೊಂದು ಮಾಹಿತಿಗಳನ್ನ ನೀಡಿದ್ದು, ಕನ್ನಡ ನೀಡಲು ಮಾತ್ರ ಆಗದು ಎಂಬ ಧೋರಣೆ ಯಾಕೆ ತಳೆದಿದೆ ಅರ್ಥವಾಗದ್ದು!!
ಬೇರೆಡೆ ಹೀಗಿದೆ ಹೋಂಡಾ Business Model:
ಅಂದಾಜು 95 ಲಕ್ಷ ಜನಸಂಖ್ಯೆ ಹೊಂದಿರುವ ಸ್ವೀಡನ್ ದೇಶದಲ್ಲಿ ಮಿಂದಾಣ ಸಮೇತವಾಗಿ ವಿವರಗಳನ್ನ ಇದೆ ಹೋಂಡಾ ಸಂಸ್ಥೆ ಸ್ವೀಡನ್ ಅಧಿಕೃತ ಭಾಷೆಯಾದ ಸ್ವೀಡಿಶ್ನಲ್ಲಿ ನೀಡಿದೆ.ಅದಕ್ಕಿಂತಲೂ 7 ಪಟ್ಟು ಹೆಚ್ಚಿನ ಅಂದರೆ 7 ಕೋಟಿಯಷ್ಟು ಜನರಿರುವ ಕರ್ನಾಟಕದ ಗ್ರಾಹಕರಿಗೆ ಮಾತ್ರ ಬೇರೆ ನೀತಿಯನ್ನು ಕಂಪನಿ ಹೊಂದಿದೆ ಎಂದರೆ ನಾವೊಮ್ಮೆ ಕುಳಿತು ಯೋಚಿಸಲೇಬೇಕು!
ನನಸಾಗಿಸೋಣ ಕನಸುಗಳನ್ನ:
ಹೌದಲ್ಲವೇ ಇದೆ ತಾನೇ ಹೋಂಡಾ ಸಂಸ್ಥೆಯ ಘೋಷ ವಾಕ್ಯ -ನನಸಾಗಿಸೋಣ ಕನಸುಗಳನ್ನ Power Of Dreams.ಮೇಲೆ ಹೇಳಿದಂತೆ ಅಂದಾಜು 1100 ಕೋಟಿಗಳ ಒಂದು ಆದಾಯ ಮೂಲಕ್ಕೆ ಕಾರಣರಾಗಿರುವ ನಾವೆಲ್ಲಾ ಕನ್ನಡ ದಲ್ಲಿ ಕೈಪಿಡಿಗೆ ಆಗ್ರಹಿಸೋಣ. ಕರ್ನಾಟಕ ಚಿಕ್ಕ ಮಾರುಕಟ್ಟೆ ಇಲ್ಲವೇ ಕೆಲವೇ ಜನರ ಚಿಲ್ಲರೆ ಬೇಡಿಕೆಗೆ ನಾವೇಕೆ ಕನ್ನಡ ಕೈಪಿಡಿ ನೀಡುವುದು ಅನ್ನುವುದು ಹೋಂಡಾ ಸಂಸ್ಥೆಯ ಈ ಗ್ರಾಹಕ ವಿರೋಧಿ ನೀತಿಗೆ ಕಾರಣವಾಗಿರಬಹುದು.ಈ ಎಲ್ಲ ಅಂಕಿ-ಸಂಖ್ಯೆ ವಾಸ್ತವಿಕ ವರದಿ ಕಂಪನಿಗೆ ತಲುಪಿಸೋಣ. ಆಗಲಾದ್ರು ಕಂಪನಿ ಎಚ್ಚೆತ್ತು ಗ್ರಾಹಕರಿಗೆ ಬೇಕಾದುದನ್ನು ನೀಡುವಂತಾಗಲಿ.ಕಂಪನಿಯೇ ಹೇಳುವಂತೆ ಗ್ರಾಹಕನ ಕನಸು ನನಸಾಗಲಿ.
ಇಲ್ಲಿಗೆ ಮಿಂಚೆ ಕಳಿಸಿ ಇಲ್ಲವೇ ಸಂಸ್ಥೆಯ ಮಿನ್ದಾಣ ದಲ್ಲಿ ನಿಮ್ಮ ಕಹಿ ಅನಿಸಿಕೆ ಹಂಚಿಕೊಳ್ಳಿ :
customercare@honda2wheelersindia.com
http://www.honda2wheelersindia.com/contact.aspxಕೊನೆಯ gear:
ಮೇಲಿನದ್ದು ಹೋಂಡಾ ಕಂಪನಿಯ ಒಂದು ಚಿಕ್ಕ ಉದಾಹರಣೆ. ಇವರ ವ್ಯವಹಾರ ರಾಜ್ಯದಲ್ಲಿ ಇನ್ನೂ ಹೆಚ್ಚಿನದೇ ಇದ್ದರೂ ಆಶ್ಚರ್ಯ ಪಡುವಂತಿಲ್ಲ. ಇದೆ ರೀತಿ ಕರ್ನಾಟಕದಲ್ಲಿ ಹಲವಾರು ವಿಶ್ವ-ಖ್ಯಾತಿಯ ಆಟೋಮೊಬೈಲ್ ಕಂಪನಿ ಕೋಟಿಗಟ್ಟಲೆ ಆದಾಯ ಕನ್ನಡಿಗರಿಂದ ತಮ್ಮ ಜೇಬಿಗಿಳಿಸುತ್ತಿವೆ. ಈ ಎಲ್ಲ ಕಂಪನಿಗಳು ನಾಡಿನ ಬಾಷೆಯಲ್ಲಿ ವ್ಯವಹರಿಸಬೇಕೆನ್ನುವ ಜಾಗೃತಿ ಉಂಟಾಗಬೇಕು.ವಿಶ್ವದ ೨ನೇ ಅತಿದೊಡ್ಡ ದ್ವಿಚಕ್ರ ಉತ್ಪಾದಕ,ವಿಶ್ವದ ನಾಲ್ಕನೇಯ ಅತಿದೊಡ್ಡ ಟ್ರಾಕ್ಟರ್ ಉತ್ಪಾದಕ,ಹಾಗು ೭ ನೆಯ ಬೃಹತ್ ಕಾರು ಉತ್ಪಾದಕ ದೇಶ ನಮ್ಮದಾಗಿದ್ದು,ದಿನೇ ದಿನೇ ಹೊಸ ಕಂಪನಿಗಳು ನಮ್ಮ ದೇಶ-ರಾಜ್ಯಕ್ಕೆ ಕಾಲಿಡುತ್ತಿವೆ.ಇದೆ ಸಮಯಕ್ಕೆ ನಾವೆಲ್ಲಾ ಎಚ್ಚೆತ್ತು ನಮ್ಮನುಡಿಯಲ್ಲಿ ಸೇವೆ ಪಡೆಯುವ ವ್ಯವಸ್ಥೆ ಕಟ್ಟೋಣ ಬನ್ನಿ!Let's Accelerate!
